Pandemiya dövrü bir çox sahələrdə tənəzzül yaratdığı kimi öz mənfi təsirini şou sektorunda da göstərib.
Maraqlıdır, qazancları əsasən toylardan və şou proqramlarından formalaşan müğənnilərin hazırkı maddi durumları necədir? Toysuz qalan müğənnilər hazırda nə işlə məşğuldurlar və hardan gəlir əldə edirlər?
Hokm.az xəbər verir ki, mövzu ilə bağlı Sfera.az-a danışan Əməkdar artist Baloğlan Əşrəfov hazırda heç bir işlə məşğul olmadığını bildirib:
“Nədənsə bu mövzular gündəmə gələn kimi ilk yada düşən müğənnilər olur. Hər kəsə bəllidir ki, bizim maddi qazancımızı toylar təşkil edir. Hazırda dövlətdən aldığım maaşla dolanıram. Buna da şükür edirəm. Allah nə verirsə onunla da dolanırıq. Bu tək bizim ölkənin bəlası deyil ki? Hamımız dərk etməliyik ki, bu dünyanın bəlasıdır və özümüzü qorumaqdan başqa çarəmiz yoxdur. Heç kim şikayət edə bilməz, çalışmalıyıq ki, özümüzü birtəhər yola verə bilək”.
Müğənni Manaf Ağayev də hazırkı durumdan şikayətçi olmadığını vurğulayıb:
“İndi mənim maddi vəziyyətim pis olsa, kimsə mənə kömək edəcək ki? Hamı necə, mən də elə dolanıram. Mən ağlamağı sevmirəm. Hər günümüzə şükür olsun. Heç bir biznesim də yoxdur. Necə dolanmağıma gəldikdə isə ac qalsam da, bunu heç kimə bəlli edən insan deyiləm. Bundan sonra da bu mövzuda heç bir jurnalistə açıqlama verməyəcəm”.
Əməkdar artist Nüşabə Ələsgərli isə hazırda evdə tələbələrinə online dərs keçdiyini deyib:
“Hər kəs kimi mən də evdəyəm. Tələbələrimə dərs keçib, maaşımı alıram. Günümü evdə keçirirəm. Tədbirlərə dəvət etsələr də getmirəm. Bu yaxınlarda tədbirə dəvət etdilər, getmədim. Belə məqamlarda çalışıram ki,özümü qoruyum”.
Müğənni Nura Suri isə sualımıza cavab vermək istəmədiyini bildirdi:
“Əvvəla mən sizi tanımıram,və mənim şəxsi nömrəmə niyə zəng vurursunuz. İlk öncə mənim mətbuat katibim var, ona zəng vurub, sualı ünvanlamalı idiniz. Mətbuat katibi uyğun görərsə mən suallara cavab verirəm. Tutaq ki, biri toy edir, mənə zəng vumalıdır? Bəs mətbuat katibləri nə üçün var? Bəlkə mən danışmaq istəmirəm?”.
