Müstəqil Sənayeçi və İş Adamları Dərnəyinin (MÜSİAD) Azərbaycan ofisinə yeni rəhbər seçilib.
MÜSİAD-dan verilən məlumata əsasən, yeni rəhbər olaraq, MÜSİAD Azərbaycan şöbəsinin vitse-prezidenti Rəşad Cabirli seçilib.
R.Cabirlinin ictimaiyyətə təqdimatında Türkiyənin Azərbaycandakı səfiri Cahit Bağçı və MÜSİAD Türkiyə ofisinin vitse-prezidenti Davut Altunbaş da iştirak edib.
Təqdimat mərasimində çıxış edən R.Cabirli MÜSİAD Azərbaycan bürosunun bundan sonra da iki ölkə arasında əlaqələrin daha da möhkəmlənməsi istiqamətində göstərdiyi səyləri davam etdirəcəyini bildirib.
1983-cü ildə Azərbaycanın Quba rayonunda doğulan R.Cabirli orta məktəbi fərqlənmə ilə bitirdikdən sonra Bakı Dövlət Universitetinin (BDU) Kimya fakültəsinə qəbul olub və 2004-cü ildə həmin universitetin bakalavr, 2006-cı ildə magistr pilləsi üzrə təhsilini başa vurub.
2019-cu ildə Türkiyənin Bahçeşehir Universitetinin (BAU) İdarəetmə (İşletme) fakültəsinə qəbul olub, 2020-ci ildə həmin fakültəni bitirərək MBA (Master of Business Administration) dərəcəsi alıb.
R.Cabirli Şimali İrlandiyanın Queen’s Universitetində (Queen’s University Belfast), Türkiyənin İstanbul Texniki Universitetində (İTÜ) sertifikat proqramlarında uğurla iştirak edərək müxtəlif sertifikatlar almışdır.
2005-ci ildə “Baku Steel Company”-də Kimyəvi sınaq laboratoriyasında laborant olaraq əmək fəaliyyətinə başlayan R.Cabirli daha sonra kimyaçı mühəndis kimi fəaliyyətinə davam edib.
2008-2010-cu illər ərzində fərdi sahibkar kimi sahibkarlıq fəaliyyəti ilə məşğul olub və 2010-2014-cü illər ərzində “NJT” şirkətində Satış və Marketinq şöbəsinin müdiri olaraq çalışıb.
Daha sonra 2015-ci ildə “Polymart MMC”-ni təsis edərək sahibkarlıq fəaliyyətini davam etdirib. Hazırda həmin şirkətdə Baş İcraçı Direktor vəzifəsini icra edir. 2018-ci ildən etibarən Azərbaycan Sahibkarlar Konfederasiyasının İdarə Heyətinin üzvüdür.
2019-cu ilin avqustundan bu günədək MÜSİAD Azərbaycanda İdarə Heyəti Sədrinin müavini, Qlobal komitənin rəhbəri olaraq fəaliyyət göstərib.
2018-ci ilin dekabrından etibarən MÜSİAD Azərbaycanın üzvüdür. Evlidir, 3 övladı var.
Qeyd edək ki, MÜSİAD Azərbaycan şöbəsinin bundan öncəki prezidenti Abdurrahman Uzun olub.
“MÜSİAD Azərbaycan – Türkiyə qardaşlığını özündə əks etdirən bir nümunədir”
“Bir millət, iki dövlət” şüarını ticarət və mədəni sahədə yaşatmağı və davam etdirməyi özünə hədəf seçən, bu istiqamətlərdə faydalı fəaliyyətlər həyata keçirən MÜSİAD Azərbaycanın bir fərdi olmaq, sonra isə idarə heyətinin üzvü olaraq xidmət etmək mənim üçün qürurlu idi. Bu gün isə rəhbər olaraq xidmət etmə şərəfinə nail olmaq mənim üçün tərif edə bilməyəcəyim bir xoşbəxtlikdir.
Bunu Müstəqil Sənayeçi və İş Adamları Dərnəyinin (MÜSİAD) Azərbaycan şöbəsinin yeni seçilən rəhbəri Rəşad Cabirli bildirib.
R.Cabirli ona göstərilən etimada görə təşəkkür edib.
“Mənə göstərilən etimada görə cənab Abdurrahman Uzun başda olmaqla, idarə heyətinin üzvlərinə, dəyərli MÜSİAD Azərbaycan ailəsinə, MÜSİAD-ın prezidenti cənab Mahmut Asmalı başda olmaqla bütün MÜSİAD rəhbərliyinə təşəkkürümü bildirirəm. Necə bir cavabdehlik daşıyacağımın fərqindəyəm. MÜSİAD-da vəzifə almaq bayraq yarışına bənzəyir. İnanıram ki, Allahın izni ilə əmanət olaraq aldığım bu bayrağı rəhbərlərimin, MÜSİAD ailəsinin və sizlərin dəstəyi ilə, birlik və bərabərlik şəraitində daha uca zirvələrə daşımaqla vəzifəmi layiqincə yerinə yetirərək məndən sonrakı üzvümüzə təslim edəcəyəm. Bu şərəfli və dəyərli vəzifəni daşıdığım müddətdə var gücümlə çalışacağıma sizin qarşınızda söz verirəm”, – deyə o qeyd edib.
R.Cabirli əlavə edib ki, Azərbaycan – Türkiyə qardaşlığını özündə əks etdirən bir nümunə olan MÜSİAD Azərbaycan hər ötən gün uğurlarını artıraraq yoluna davam edəcəkdir.
“Bu il 15 iyun tarixində dövlət başçılarımızın imzaladığı Şuşa Bəyannaməsinin sonuncu bəndini icazənizlə diqqətinizə çatdırıram; Tərəflər lazımi dövlət dəstəyini təmin edərək xalqları arasında müştərək dəyərlərə söykənən sıx əlaqələri humanitar, sosial müdafiə, elm, təhsil, səhiyyə, mədəniyyət, gənclər və idman sahələrində daha da inkişaf etdirəcək və dərinləşdirəcəklər. Bu məqsədlə iki ölkənin aidiyyəti qurumları tərəfindən birgə, davamlı fəaliyyətlər həyata keçiriləcəkdir – Mən burada dəfələrlə şahidi olduğum, cənab səfirimizin hər zaman önəmlə diqqət çəkdiyi “İnkişaf etdirəcək və dərinləşdirəcəklər” ifadəsini xüsusi qeyd etmək istəyirəm. Azərbaycanla Türkiyə arasında dostluq və qardaşlıq əlaqələri qədim tarixə malikdir. Əsrlər boyu xalqlarımız həmişə bir-birinə dəstək olmuş, sıx əməkdaşlıq etmiş, ulu öndər Heydər Əliyevin müdrikcəsinə dediyi kimi, “bir millət, iki dövlət” olmuşlar. Təsadüfi deyildir ki, Türkiyə dövlətinin qurucusu dahi Mustafa Kamal Atatürk Azərbaycanın kədərini Türkiyənin kədəri, sevincini isə Türkiyənin sevinci hesab etmişdir.
Bir millətin nümayəndələri olaraq bizlər bu münasibətlərin bundan sonra da inkişaf etdirilməsi və dərinləşdirilməsi istiqamətində əlimizdən gələni edəcəyik”, – o vurğulayıb./trend/
