Fəlsəfə tarixində pessimist alim kimi tanınan alman filosofu Artur Şopenhauerin ölümündən sonra şəxsi əşyaları arasında “Xoşbəxt olmaq sənəti” adlı əlyazması aşkar edilib. Maraqlıdır ki, Şopenhauerin həyatı boyu müdafiə etdiyi bütün bədbin fikirlərə baxmayaraq, o, əzablardan qaçmağa kömək edə biləcək bir sıra qaydalar işləyib hazırlayıb.
Alman filosofu Artur Şopenhauer hesab edirdi ki, xoşbəxtlik tamamilə subyektiv hissdir, illüziyadır.
Hokm.az oxucuları məşhur filosofun xoşbəxtlik qaydaları ilə tanış edir.
1. Şopenhauerin birinci qaydası: müqayisə etməyin!
Birinci qaydada deyilir ki, özünü başqaları ilə müqayisə etmək vərdişini aradan qaldırmaq lazımdır, bu, paxıllıq hissinə səbəb olur. Şopenhauerə görə, paxıllıq insandan sevinc və xoşbəxtliyi oğurlayan mənfi hissdir.
Paxıllıq bizi xoşbəxtlikdən əks istiqamətə – kədərə aparır. Başqaları ilə müqayisə aparanda özümüzdən şübhələnməyə başlayırıq ki, bu da vəziyyəti gərginləşdirir. Bu əzabın qarşısını almaq üçün Şopenhauer qəti şəkildə müqayisə etməməyi tövsiyə edirdi. Hər bir insan fərdidir, bu, onun gözəlliyi və əzəmətidir. Hər kəsin öz vəziyyəti və öz imkanları var. Odur ki, həyatımızı bu imkanlar üzərində qurmalıyıq, başqalarının hansı nailiyyətlər əldə etdiyi üzərində deyil.
2. Uğursuzluqlar sizi ruhdan salmasın!
Şopenhauerin başqa bir xoşbəxtlik qaydası bizə səhv qərarlarımızın səbəb olduğu uğursuzluğu ürəyimizə çox yaxın qəbul etməməyi öyrədir. Alman filosofu həmişə mümkün olan hər şeyi etməyə və hadisələrin bundan sonra necə inkişaf edəcəyindən narahat olmamağa çağırır. Əlinizdən gələni etmisinizsə, pis nəticəyə görə əsəbləşməyin mənası yoxdur: başınızın üstündən tullana bilməzsiniz.
3. Ürəyinizin səsinə güvənin
Şopenhauer yazırdı ki, bütün insanlar fərqlidir. Kimsə daha yaradıcıdır, kimsə daha praqmatikdir. Bu o deməkdir ki, bəziləri əmələ, bəziləri isə təfəkkürə daha çox meyllidir.
Bir sözlə, xoşbəxtliyin üçüncü qaydası bizə ürəyimizə güvənməyi, ruh nəyi əmr etsə, onu etməyi öyrədir. Ancaq özünüz olmaq üçün ilk növbədə özünüzü tanımalısınız.
4. Heç kimdən asılı olmayın
Xoşbəxtliyin dördüncü qaydası bizə həyatda yalnız özümüzə güvənməyi öyrədir. Beləliklə, məyusluq bizdən yan keçir, digər insanların davranışları sarsıdıcı təsir göstərməyəcək. Biz başqalarının və digər insanların qərarlarına nəzarət edə bilmərik, lakin buna reaksiyalarımız tamamilə özümüzdən asılıdır.
Başqalarının əhvalınıza təsir etməsinə imkan verməyin. Xoşbəxt olmağa və həyatdan həzz almağa yalnız özünüz qərar verirsiniz, ya da kiminsə gümüş sinidə sevinc gətirməsini gözləyə bilərsiniz…
5. İstəklərinizi çox qiymətləndirməyin
Hər istəyimiz yerinə yetirilə bilməz, ona görə də onlarla çox da məşğul olmayın. Hər şeyin istədiyimiz kimi olmayacağını qəbul etmək əzab və məyusluqdan qaçmağa kömək edir. Bir şey alınmırsa, sizdə yaratdığı dəyişikliklərə baxın, bəlkə də bu, sizin deyilmiş.
Vəziyyəti hərtərəfli qiymətləndirin ki, enerjinizi qeyri-real məqsədlər uğrunda boşuna xərcləməli olmayasınız və onlara yaxınlaşa bilməyəndə üzülməyəsiniz. Bu o demək deyil ki, xəyallar qurmamalısınız. Bu o deməkdir ki, havada qala tikmək olmaz.
6. Gözləntilərinizə nəzarət edin
İstəklər kimi gözləntiləri də tənzimləməyi öyrənməliyik. Bu yolla insanlar və ya şəraitlə bağlı gözləntiləri həddindən artıq qiymətləndirməkdən qaça bilərik. Sadə dillə desək, bu qayda həyata real baxmağı öyrədir. Maneələr həmişə olub, var və olacaq, ona görə də onları ən müdrik yolla necə dəf etmək barədə düşünmək lazımdır.
7. Sahib olduqlarınızın dəyərini bilin
Xoşbəxtliyə gəlincə, xoşbəxtliyin alına bilməyəcəyini xatırlamaq vacibdir. Əsl xoşbəxtliyin pulun və ya maddi sərvətin miqdarı ilə heç bir əlaqəsi yoxdur. Bunu başa düşdükdən sonra özünüzü başqaları ilə müqayisə etməyi və qısqanclığı dayandıran kimi həyatda həqiqətən nəyin vacib olduğunu dərk edirsiniz.
8. İndiki zamanda yaşayın
Son qayda gələcək haqqında düşünmək və keçmişə peşman olmaq üçün nə qədər vaxt itirdiyimizlə bağlıdır. Sabah üçün narahat olmaq və keçmiş səhvlərə görə peşman olmaq heç bir məna kəsb etmir.
Bundan əlavə, etiraf etməliyik ki, biz keçmişdə qəbul edilmiş qərarları dəyişdirə bilmərik.
Gələcəyə gəlincə, siz davamlı olaraq baş verəcəkləri xəyal edəndə və xoşbəxtliyi onunla əlaqələndirəndə indiki vəziyyət sizə neqativ gətirir. Odur ki, sadəcə indidən həzz alın. Bu gün əlimizdə olan şey budur: keçmiş artıq yoxdur və gələcək hələ gəlməyib.Publika.az
