**** 29 Avqust 2021 – 17:00
“Dəryaz” qəzeti redaksiyasına videoformatda müraciət edən vətəndaş Quliyev Nofəl Nəriman oğlu Gədəbəy rayonunun Arısu kəndində doğulub, hazırda Bakıda yaşayır. Bildirir ki, yanvar ayının 16-da kənddə yaşayan 88 yaşlı anası Quliyeva Qəndab Hüseynqulu qızı ilə növbəti telefon danışığında anası ona deyib ki, qonşuluqda yaşayan 86 yaşlı xalasının evindən təxminən 22 min manat pul oğurlanıb.
N.Quliyev qeyd edir ki, məlumatı alan kimi kənd icra nümayəndəliyinin sədrinə zəng vurub xəbər verib. İcra nümayəndəsi ilə polis sahə müvəkkili gedib pul oğurlanan evə baxış keçiriblər. Oğurlanan pulun məbləğini, hansı qabın içindən götürüldüyünü xalasından öyrəniblər və çıxıb gediblər. Daha iki gün sonra o, Daxili İşlər Nazirliyinin “!02” qaynar xəttinə zəng vurulandan sonra Gədəbəy Rayon Polis Şöbəsinin (RPŞ) Əməliyyat İşləri üzrə rəis müavini Elsevər Tağıyevin başçılığı altında Şöbənin 3 nəfər əməkdaşı gəlib oğurluq olmuş evi axtarmağa başlayıblar. Evin içində ayrı yerdə olan — 3600 dolları, 2725 manatı götürüb pulu tapdıqlarını elan ediblər. E.Tağıyev həmin vaxt bacısıgildə olan Qəndab Quliyevanı da təhqir edib.
“88 yaşlı anamın üstünə qışqırıb. Soruşub ki, bu qədər pul sizdə hardandı. Niyə camaata şər atırsınız? Sənin yiyən yoxdu? – deyir N.Quliyev: — Həmin pulu götürüb aparıblar polis şöbəsinə. Sonra da zəng eləyiblər Rauf müəllimə ki, bəs o qarını gətir, gəlsin izahat versin ki, pulu tapılıb, pulu da götürüb getsin. Təsəvvür edin, bu yaşlı adamın son qəpiyinə kimi götürüblər, nə də ghətirib vermirlər ki, mütləq polisə gedib pulunun tapıldığını etiraf etməlidir”.
Şikayətçi həmçinin E.Tağıyevdən fərqli olaraq qoca xalasının o qədər pulunun olmasında təəccüblü heç nə olmadığını bildirir: “Uzun müddətdi xalam nənəmlə yaşayırdı. Nənəm 3 il əvvəl dünyasını dəyişəndə 110 yaşı var idi. Rəhmətlik 300 manatdan yuxarı pensiya alırdı. Üstəlik, hər il də dövlət ona müharibə iştirakçısı kimi 1000 manata kimi birdəfəlik pul mükafatı verirdi. İkisinin aldıqları pensiya üst-üstə 500 manatdan artıq olurdu. Bundan əlavə, xalamın təsərrüfatı olub, keçən ilə kimi iri və xırdabuynuzlu heyvanlar bəsləyirdi. Keçən il yayda heyvanları satıb pulunu özünə verdim ki, daha saxlamasın, gücü çatmır. Digər qohumlar – qardaşı, bacısı uşaqları da ona yardım edirdilər. Yaşına rəğmən elə böyük istehlak xərci də yox idi. O da pullarını yığıb saxlamışdı…”
N.Quliyev polis zabitinin təhqir etdiyi anasından üzr istəməsini və xalasının oğurlanmış pulunun tapılması üçün iz itməmiş zəruri tədbir görülməsini tələb edir: “Şahidlər deyirlər ki, Elsevərə hətta yanındakı həmkarları da deyiblər, bu ailəni təhqir etmək olmaz. Amma ona kar etməyib…”
******** 30 Avqust 2021 – 17:20
DİN-in Mətbuat Xidmətinin Gəncə regional qrupun baş inspektoru polis baş leytenantı Eşqin Qasımov məsələ ilə bağlı hokm.az-a bildirib ki, Gədəbəy rayon Arısu kənd sakini Tərlan Məmmədovanın evindən polis əməkdaşlarının pul götürməsi barədə iddiaları tamamilə ilə yanlışdır və böhtan xarakterlidir. Məlumat üçün qeyd edim ki, 2020-ci il dekabr ayının 17-də Gədəbəy rayon Polis Şöbəsinə adıçəkilən xanımın evindən 30.000 manat pul oğurlanması barədə məlumat daxil olmuş və məlumatla əlaqədar polis əməkdaşları dərhal hadisə yerinə gələrək müvafiq araşdırmalar aparmışdır. Müraciət müəllifi izahatında paltar sandığında saxladığını həmin gün baxdıqda yerində tapmadığını bildirmişdir. Polis əməkdaşları həmin sandığa baxış keçirən zaman vətəndaşa məxsus 3600 ABŞ dolları və 2725 manat nağd pul həmin sandıqdan tapılaraq, hal şahidlərinin iştirakı ilə vətəndaşa geri qaytarılmış, Tərlan Məmmədova izahatında araşdırmadan tam razı qalaraq polis əməkdaşlarına təşəkkür etmişdir.
Hokm.az
