Quzey Kıbrıs Türk Cümhuriyyətinin (KKTC) Prezidenti Ersin Tatar Birləşmiş Millətlər Təşkilatının (BMT) Baş katibinin Kiprdəki yeni xüsusi nümayəndəsi və BMT Sülhməramlı Qüvvələrinin (UNFICYP) Kiprdəki missiyasının rəhbəri Kolin Stüartın verdiyi “İlin Sonu Qəbulunda” iştirak edib.
Hokm.az xəbər verir ki, Kiprdə səlahiyyət müddəti başa çatan Elizabet Speharın yerinə təyin olunan Stüart Ledra Palace otelində “İlin Sonu Qəbulu” verib.
Qəbulda Kipr rum lideri Nikos Anastasiadis də iştirak edib. Sentyabrın 27-də Nyu Yorkda Birləşmiş Millətlər Təşkilatının (BMT) baş katibi Antonio Quterreşlə üçtərəfli görüşdə görüşən iki lider dünən axşam ilk dəfə görüşüb.
Qəbulda qısa bir çıxış edən Stüart liderlərin təxminən bir ilə yaxın bu tədbirdən sonra adada ilk dəfə bir araya gəldiyini söyləyərək, tədbirdə iştirak etməkdən şərəf duyduğunu bildirib.
Qəbulun qeyri-rəsmi tədbir olduğunu deyən Stüart hər kəsi yeni il münasibətilə təbrik edib və gələn il daha çox irəliləyiş əldə olunmasını arzulayıb.
