“Bandotdel” əməliyyat keçirdi: 1 milyon maska aşkarlandı (FOTOLAR) – YENİLƏNİB

09 Mart 2020 - 11:09

“Bandotdel” əməliyyat keçirdi: 1 milyon maska aşkarlandı (FOTOLAR)

Daxili İşlər Nazirliyi (DİN) Baş Mütəşəkkil Cinayətkarlıqla Mübarizə İdarəsinin əməkdaşları tərəfindən ölkə ərazisində son günlər tibbi maskalara artan tələbatdan sui-istifadə edərək bu ləvazimatların real dəyərindən dəfələrlə baha qiymətə satışını həyata keçirməyə cəhd edən, habelə qaçaqmalçılıq yolu ilə ölkə hüdudlarından kənara çıxarmağa çalışan şəxslərə qarşı kompleks əməliyyat tədbirləri həyata keçirilib.

Hokm.az bildirir ki, DİN-in Mətbuat Xidmətindən Qaynarinfo-ya verilən məlumata görə, tədbir zamanı yaranan vəziyyətdən sui-istifadə edərək qanunsuz yolla gəlirlərini artırmaq istəyən, ayrı-ayrılıqda fəaliyyət göstərən, içərilərində xarici ölkə vətəndaşları da olan bir neçə dəstə ifşa edilib və onların hər bir üzvü saxlanılıb.

Belə ki, əməliyyat zamanı İran İslam Respublikasının vətəndaşları Bahadur Davud, Moenifard Seyidməhəmməd, Saviz Amiryusif külli miqdarda tibbi maskaları satmaq istəyən zaman tutulublar. Həmçinin, Baş İdarə əməkdaşları tərəfindən keçirilən əməliyyat zamanı Çin Xalq Respublikasının vətəndaşları Yang Kun və Yiming Liunun ölkədən qaçaqmalçılıq yolu ilə öz vətənlərinə göndərmək məqsədilə tədarük etdikləri külli miqdarda tibbi maskalar onların Bakı şəhəri Yasamal rayonunda kirayədə yaşadıqları mənzildən aşkar olunaraq götürülüb. Əməliyyat tədbirlərinin davamı olaraq Çin vətəndaşlarını külli miqdarda tibbi maska ilə təmin etməkdə şübhəli bilinən paytaxt sakini Arif İsmayılov da müəyyən edilərək saxlanılıb.

Baş İdarə əməkdaşları tərəfindən keçirilən daha bir tədbir zamanı Xaçmaz rayon sakini Elvin Balamətov, Bakı şəhər sakini Elşən Ələkbərov, eləcə də paytaxt sakinləri Aslan Musayev, Şahin Fərzəliyev və Vaqif Mehbalıyev tibbi maska satarkən saxlanılıblar. Qeyd edək ki, bu şəxslər tibbi maskaları real dəyərindən dəfələrlə baha qiymətə satışa təqdim etdikləri üçün ifşa ediliblər.

Baş İdarənin əməkdaşları tərəfindən keçirilən tədbirlər nəticəsində ümumilikdə 1 milyon ədədə yaxın tibbi maska müəyyən edilərək dəstə üzvlərindən maddi sübut kimi götürülüb.

Aşkar edilən faktlarla bağlı Baş İdarədə araşdırmalar davam etdirilir.
*******************

Saxlanılan Çin Xalq Respublikasının vətəndaşı Liu Yiming və Yang Kun tərəfindən redaksiyamıza göndərilən açıqlamanı dərc edirik:

Liu Yiming, Bakı Dövlət Universitetinin Geologiya fakültəsinin tələbəsiyəm və bir neçə ildir ki, Bakı şəhərində yaşayıram. 03.03.2020-ci il tarixində Ren adlı tanışım mənə tibbi maskalar vermiş, yataqxanada saxlamağımı xahiş etmiş və onları tezliklə məndən götürəcəyini bildirmişdir. Bundan bir neçə gün sonra polislər yaşadığım yerə gələrək əsassız olaraq orada axtarış aparmış və tibbi maskaları aşkar edərək götürmüş, məni isə Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinə aparmışlar.

Orada izahat verərək tibbi maskaların tanışıma məxsus olduğunu və mənə saxlanmaq üçün verildiyini bildirmiş və təqsirim olmadığı üçün azad buraxılmışam.

Əlavə olaraq həmçinin bildirməliyəm ki, həmin şəkil və videolarda Çin üz cizgilərinə malik olan dostum Yang Kun da cinayətkar dəstənin bir üzvü kimi göstərilib. Halbuki. Həmin şəxs sadəcə mənim dostum olmaqla mənə tərcüməçilikdə köməklik göstərib.

Və bu baxımından da mən Yang Kunun hüquqları pozulmuşdur.

Bir daha qeyd olunmalıdır ki, göstərilən cinayətkar fəaliyyətlə heç bir əlaqəmiz yoxdur və tibbi maskalar Liu Yimingin tanışına məxsus olmaqla Liu Yiming yaşadığı evə sadəcə saxlanılmaq üçün qoyulmuşdur.