Bakının Yeni Ramana yolunda (Buta Palace-ın yaxınlığında)yerləşən dairəyə əkilmiş ağaclar sürücülərə təhlükə yaradır. Bu barədə bir neçə sürücü redaksiyamıza şikayət ünvanlayıb.
Hokm.az Avtosfer.az-a istinadən xəbər verir ki, sözügedən dairənin həm özündə, həm də dairənin bilavasitə qarşısındakı adacıqlarda ağaclar əkilib. Həmin ağaclar kifayət qədər qollu-budaqlı olduğuna görə sürücülərin görünüş dairəsini məhdudlaşdırır. Qeyd edək ki, ağaclar həmin əraziyə yeni əkilib. 1-2 ildən sonra qol-budaq ataraq sürücülərin görünüşünü tam şəkildə məhdudlaşdıracaq. Ona görə də aidiyyəti qurumlar indidən tədbir görməlidir.
Görünmə bucaqları normal olmalıdır ki, fərqli istiqamətdən gələn nəqliyyat vasitələrinin sürücüləri bir-birini görə bilsinlər. Onu da təmin etmək üçün yaşıllıqların hündürlüyü 70 sm-dən yuxarı olmamalıdır və yaxud da nəhəng ağaclar olsa aşağıdan 2 metrlik hündürlükdə gövdələrindəki budaqlar təmizlənməlidir.
Lakin problemin köklü həll olunması üçün yaxşı olardı ki, əkilmiş ağaclar oradan çıxarılaraq başqa yerə köçürülsün.