Son illərin statistikasına görə, piyadavurmalarla nəticələnən qəzaların sayı ümumi yol-nəqliyyat hadisələrinin 60 faizindən çoxunu təşkil edir. Qəzaların əksəriyyəti isə piyadaların məsuliyyətsizliyi ucbatından baş verir. Lakin nəticədə sürücülər bundan əziyyət çəkir. Təqdim edəcəyimiz videoda iki hadisə qeydə alınıb. Son anda sürücülərin ayıq tərpənməsi qəzadan xisal olmasına səbəb olub.
İlk epizodda uşağı ilə birlikdə qaçaraq yola çıxan ana var. Avtomobillərin intensiv hərəkət etdiyi keçədə özünü real təhlükəyə atır. İkinci epizodda isə başı telefona qarışan gənc qız yolun ortasında sanki bulvarda gəzirmiş kimi hərəkət edir.
Bakı Şəhər Dövlət Yol Polisi İdarəsinin şöbə rəisi, polis polkovniki Vaqif Əsədov Avtosfer.az-a bildirib ki, piyadavurmalarmalarla bağlı həm yol polisi, həm də digər təşkilatlar mütamadi olaraq maarifləndirmə tədbirləri həyata keçirir. “Piyadalara yalnız keçidlərdən istifadə etmək tövsiyə olunur. Eyni zamanda sürücüləri də diqqətli olmağa çağırırıq. Xüsusilə günün qaranlıq vaxtlarında sürət həddini azaltmaq yaxşı olar. Mümkünüdür ki, kimsə yola çıxsın. Heç olmasa xəsarətin qarşısını tam almaq, yaxud miqyasını azaltmaq lazımdır. Düşünürük ki, bu barədə aparılan işlər öz nəticəsini verəcək.”
