Hokm.az – Seçilmiş ABŞ prezidenti Donald Tramp, BRICS ölkələrinə ABŞ dollarından imtina etməmələri üçün sərt xəbərdarlıq edib.
Tramp, bu ölkələrə 100%-lik tariflərlə hədələyərək, yeni bir valyuta yaratmaq cəhdlərinin qarşısını alacağını bildirib. Onun sözlərinə görə, əgər BRICS ölkələri dolları əvəz edəcək bir valyutaya dəstək verərsə, ABŞ onları ağır maliyyə cəzaları ilə üzləşdirəcək.
Tramp, Truth Social sosial şəbəkəsində yayımladığı mesajında belə bildirib: “Dolları tərk etməyə cəhd edən BRICS ölkələrinin ideyasına son qoyuldu. Biz onların yeni bir valyuta yaratmasına icazə verməyəcəyik və əks halda 100%-lik tariflər tətbiq edəcəyik.”
ABŞ prezidenti seçilən Tramp, əvvəlki seçki kampaniyasında da dolları tərk edən ölkələrin ağır nəticələrlə qarşılaşacağını bildirmişdi. Tramp və onun iqtisadi müşavirləri, ABŞ dollarının dünya iqtisadiyyatında dominantlığını qorumaq üçün bir sıra tədbirləri müzakirə edirlər. Bu tədbirlərə ixrac nəzarəti və valyuta manipulyasiyaları ittihamları ilə mübarizə də daxildir.
Əlavə olaraq, Trampın iqtisadi müşavirləri, həm müttəfiq, həm də düşmən ölkələrin ikitərəfli ticarət aparmaq üçün öz valyutalarını istifadə etmələrinə qarşı mübarizə aparmağı planlaşdırır. Tramp, dolların dünya iqtisadiyyatında hegemonluğunu qorumağı və digər ölkələrin bu valyutadan imtina etmələrinə mane olmağı hədəfləyir.
Bununla belə, analitiklər Trampın bu yanaşmasını tənqid edir, ABŞ-ın həm ticarət balansını azaltmaq, həm də dolların gücünü artırmaq məqsədinin bir-birinə zidd olduğunu bildirirlər. Karnegi Beynəlxalq Sülh Fondunun elmi işçisi Maykl Pettiş, Trampın yeni iqtisadi strategiyasının ABŞ-ın qlobal ticarət sistemindəki yerini çətinləşdirəcəyini vurğulayıb.
