Ötən gün Milli Məclisin Əmək və sosial siyasət komitəsinin sədri Musa Quliyev ölkədə koronavirusa yoluxma statistikasının artması səbəbi ilə tələbələrin qış tətilinin uzadılmasını təklif etdi.
Hokm.az xəbər verir ki, deputatın bu təklifi sosial şəbəkələrdə geniş müzakirələrə səbəb olub.
M. Quliyev yeni təhsil sessiyasının başlanmasını “Omicron” ştamı epidemiyasının pik dövrünə təsadüf etdiyindən gələn həftə içərisində yeni alovlanma ilə qarşılanma təhlükəsi olacağını deyib.
Təhsil Nazirliyinin İctimaiyyətlə əlaqələr sektorunun müdiri Cəsarət Valehov bildirib ki, hazırda bu məsələ müzakirə mövzusu deyil.
“Hazırda bu məsələ Təhsil Nazirliyində müzakirə olunmur”, – deyə nazirlik rəsmisi bildirib.
Qeyd edək ki, ötən gün Səhiyyə naziri Teymur Mustafayev brifinqdə hazırda “Omicron”la bağlı məhdudlaşdırıcı addımların atılmasına zərurət olmadığını bildirmişdi. modern.az
