Ölkəmizin aparıcı biznes platformalarından olan “İşgüzar Klub” dekabrın 29-da 1 saylı 18 yaşınadək əlilliyi müəyyən edilmiş şəxslər üçün sosial xidmət müəssisəsində sağlamlıq imkanları məhdud, xüsusi qayğıya ehtiyacı olan uşaqlar üçün bayram şənliyi təşkil edilib. Bakı Şəhər Mədəniyyət Baş İdarəsinin təşkilati, “Başkent Restoranlar Şəbəkəsi” və “Preda Sağlamlıq Məhsulları, Sənaye və Ticarət şirkəti”nin sponsorluğu ilə baş tutan ziyarətdə “İşgüzar Klub”un üzvləri, biznes elitasının nümayəndələri, tanınmış mədəniyyət və incəsənət xadimləri və dövlət rəsmiləri iştirak ediblər.
Tədbirdə Azərbaycan Respublikasının əməkdar artisti Dilarə Əliyeva, “İşgüzar Klub”un İdarə Heyətinin sədri İradə Şükürova, direktoru Samirə Quliyeva, Bakı Şəhər Mədəniyyət Baş İdarəsinin məsul əməkdaşı Nərmin Qafarlı, “Başkent Restoranlar Şəbəkəsi”nin təsisçisi Mətanət Mədinəyeva, “Preda Sağlamlıq Məhsulları, Sənaye və Ticarət şirkəti”nin rəsmisi İbrahim Uyğun çıxış edərək, Dünya Azərbaycanlılarının Həmrəyliyi Günü və Yeni il münasibətilə xüsusi qayğıya ehtiyacı olan uşaqları və müəssisənin kollektivini təbrik ediblər.
Onlar bildiriblər ki, 2024-cü il də ölkəmizin həyatında mühüm hadisələrlə yadda qalıb və cənab Prezident İlham Əliyevin rəhbərliyi altında Azərbaycan ciddi nailiyyətlərə imza atıb. Çox qürurverici məqamdır ki, yol saldığımız ildə də xalqımız Müzəffər Ali Baş Komandana etimad göstərib və cənab İlham Əliyev yenidən Azərbaycan Respublikasının Prezidenti seçilib.
“İşgüzar Klub”un korporativ sosial məsuliyyətə xüsusi önəm verdiyi, biznes tərəfdaşları ilə birlikdə qayğıya ehtiyacı olan soydaşlarımıza mütəmadi yardımlar etdiyi diqqətə çatdırılıb. Klubun və sponsorların adından uşaqlara bayram sovqatları, eksklüziv şirniyyatlar, uşaq bezləri, gigiyenik vasitələr və digər hədiyyələr paylanıb. Sosial xidmət müəssisəsinin kollektivi ilə xatirə fotosu çəkdirilib.
Xatırladaq ki, “İşgüzar Klub” ötən ilin fevralından fəaliyyət göstərir və nüfuzlu işgüzar simaları bir araya gətirib. Biznes ictimaiyyəti arasında işgüzar, faydalı və qarşılıqlı əməkdaşlığın, əhalinin məşğulluq imkanlarının artırılmasına nail olmaq istiqamətində fəaliyyət göstərən “İşgüzar Klub” dövrü olaraq qayğıya ehtiyacı olan soydaşlarımız üçün xeyriyyə aksiyaları təşkil edir.
