Son dövrlər peşəkarlıq səviyyəsi yetərincə olmayan bəzi həkimlərin vətəndaşların sağlamlığına zərər vurması tibb işçilərinin sertifikasiyası məsələsini yenidən gündəmə gətirib.
Hokm.az mövzu ilə bağlı Azərbaycan Tibb Universitetinin professoru Rəşid Mahmudovun və professor Adil Qeybullanın fikirlərini öyrənib.
Rəşid Mahmudovun sözlərinə görə, Azərbaycanda həkimlərin sertifikasiyasına ehtiyac yoxdur:
“Həkimlərin diplomu var, həmin diplomla işləməlidirlər. Amma bir də uzman həkimlər var ki, onlar 5 ildən bir üzərlərində çalışmalıdırlar. Əvvəllər savadı artırmaq üçün yeni şeylər tapıb kəşf edilirdi. Uzman olmaq üçün 5 ildən bir sertifikat almaq olar. Bu nöqteyi-nəzərdən baxdıqda sertifikasiya uyğundur. Amma sertifikasiyadan keçməyən həkimin işləməməsi mümkün ola bilməz”.
Adil Qeybulla isə bildirib ki, həkimlər sertifikasiyadan yox, akkreditasiyadan keçməlidir:
“Dünyanın hər yerində akkreditasiya sistemi var. Yəni həkimlər baza və rezidentura təhsili aldıqdan sonra onlara konkret bir sahə üzrə fəaliyyət göstərmək üçün lisenziya verilir. Bu lisenziyanın müddəti 5, yaxud 7 il ola bilər. Həmin müddət bitdikdən sonra təkrar akkreditaisya aparılır, şəxsin həmin müddət ərzindəki fəaliyyəti, nə qədər konfrans və təcrübə mübadiləsində olduğu araşdırılır. Ondan sonra ona yeni dövr üçün lisenziya verilir. Əgər bir şəxs öz ixtisasını dəyişmək istəyirsə, təkrar rezidentura keçməlidir. Prinsip və qayda budur, bundan kənarda olan hər şey Azərbaycan yaradıcılığıdır”.
