Oktyabrın 26-da Gürcüstanda parlament seçkiləri keçirilib. Mərkəzi Seçki Komissiyasının son məlumatına görə, seçicilərin 54,09 faizi hakim “Gürcü Arzusu” partiyasına etimad göstərib. Seçkilərdə soydaşlarımız da çoxluq təşkil edib. Azərbaycan da seçkilərdə hakim partiyanın qalib gəlməsini arzu edirdi. Soydaşlarımız həm də Azərbaycanın xarixi siyasətinə uyğun addım atıb.
Məsələ ilə bağlı Modern.az-a danışan Milli Məclisin deputatı Naqif Həmzəyev bildirib ki, növbəti dövrdə də Gürcüstanda stabillik və təhlükəsizlik mühiti görəcəyik:
“Gürcüstanda parlament seçkiləri başa çatıb. “Gürcü Arzusu” Partiyası səs çoxluğu toplayaraq, növbəti dəfə iqtidarını qoruyub. İnanırıq ki, bu seçim Gürcüstan dövləti və xalqı, bu ölkədə yaşayan bütün millətlər üçün xoş olacaq. Azərbaycan Gürcüstanın ən yaxın iqtisadi tərəfdaşlarından biridir. Gürcüstan Azərbaycan, Azərbaycan da Gürcüstan üçün çox önəmlidir. Bu baxımdan da biz inanırıq ki, bu günə qədər olan razılaşmalar, iqtisadi layihələr budan sonra da uğurla davam etdiriləcək. Qarşılıqlı etimad və inam öz qüvvəsində qalacaq. Əsas odur ki, növbəti dövrdə də biz Gürcüstanda stabillik və təhlükəsizliyin şahidi olacağıq. Gürcüstanda yaşayan soydaşlarımızın da taleyi, gələcəyi bizi çox düşündürürdü. Bu məsələdə də artıq düşünürəm ki, heç bir problem olmayacaq. Onlar da rahat, firavan şəkildə həyatlarını davam etdirəcəklər”.
Deputat Azərbaycanla Gürcüstanın birlikdə Cənubi Qafqazda uzunmüddətli, dayanıqlı sülh üçün ortaq layihələr həyata keçirə biləcəyinə inandığını söyləyib:
“Ermənistan da Azərbaycanla Gürcüstan münasibətlərindən ilhamlanaraq, mövcud əlaqələrin hər iki ölkə üçün yaratdığı imkan və şəraiti düzgün dəyərləndirəcək və Azərbaycanla yaxınlaşmanı həyata keçirə biləcək. Azərbaycanla uzunmüddətli sülh baş tutacaq. Beləliklə də, biz nəhayət, Cənubi Qafqazda Qafqaz ailəsi ideyasının reallaşdırılmasını həyata keçirəcəyik. Seçkilərlə əlaqədar olaraq, Gürcü xalqını təbrik edirəm. İnanıram ki, gələcəkdə də Azərbaycan-Gürcüstan münasibətləri, dostluğu, qardaşlığı həmişə inkişaf edəcək”.
